• قررت اشتري فلاش ميموري برغم انو عندي هاردسكـ بس مشكلة الهاردسكـ ماتقدر تشيلو في كل مكان وقباها كان عندي فلاش قد الأصباع (اتوقع بعضهم يعرفوه اسمو كينق ماكس ) بس للأسف اتكسر جزء منو فما سرت اقدر احطو في الميدالية وفي النهاية ضاع ( كان شغال موقت ماضاع  :ui:) فرحت الهايبر بندة (الي في الروشان مول )بما انو قريب وقبل فترة شفت موديلات حلوة من الفلاشات واخترت فلاش سوني 2جيجا من النوع الصغير جداً (ترى الصورة مكبرة :))

    بعد اسبوع تقريباً وانا استخدم الفلاش في السيارة (اشبكو من mp3 السيارة ) المهم مدري كيف دقيت الفلاش وانعوج :( بعدها مو راضي يشتغل ابداً  :8(  الحمدلله ان الفلاش لساعو على الضمان :) (الضمان اسبوعين )
    على طول رحت للهايبر وقلتلهم الفلاش مو شغال ما أخذو 10 دقايق الا بدلت الفلاش بواحد تاني انا اخذت فلاش كبير عشان ما ينكسر ( لايلدغ المؤمن من جحرٍ مرتين :D) دي صورة الفلاش

    القصة لسه ما انتهت بعد شهر (يعني قبل يومين ) الفلاش مو راضي يشتغل :8(
    اتوقع السبب من المديريتور الي في السيارة ( الي هو الـ mp3 ) لأنو في الفترة الأخيرة سار يستبله وهو آخر مكان شغلت فيه الفلاش ميموري
    انا كده اتحطمت  :8( دافع 50 ريال في فلاش وبعدين ما اتهنى بيه :(  انا قلت خليني اجرب اودي للهايبر مرة تانية اشوف ممكن يصلحوه ولا يعطوني بدالو
    رحت وما تصدقو انا متوقع انو يقولولي خلص الضمان (الضمان اسبوعين وانا جاي بعد شهر ) رحت وقلتلم القصة الا الموظف جرب الفلاش ما اشتغل راح فتح علبة جديدة واعطاني فلاش جديد بدالو  :p: انا طماع شفت فلاش تاني قلت ممكن تستبدل دا بدا  :ui: قلي معليش لو جاي في الضمان كان ممكن ساعدتكـ أكثر المهم أخذت الفلاش وشكرت الموظف وانا مني مصدق :) انو الفلاش الي معاية يشتغل (لأني فكرت اني ما اشتري فلاش ميموري نهائياً اثنين مرة وحدة ينخربو :( )
    هذا يعطي نقطة لهايبر بندة في تعامولو مع الزبائن :D
    افتكر احد اقربائي راح اشترى من ايكيا ابجورتين المهم بنتو الصغيرة كسرت وحدة منها ( دا من زمااان ) هو قال عشان لاتنكسر الثانية خليني ارجعها للمحل راح لهم سألوه نحن راح نرجعها بس ليه ؟؟
    قالهم الحكاية قالولو جيب قطة من الأبجورة المكسورة ونحن نبدلكـ هيه قالهم بس الغلط مني مو منكم قالولو ما عليكـ انته جيبها ونحن نعطيكـ بدالها المهم هو جابها واعطولو بدالها وحدة جديدة

    السؤال الي يتبادر لذهن اي واحد ليش ايكيا ولا هايبر بندة سوو زي كده ؟؟؟
    انا وجهة نظري وحتى قريبي (الي هو عمي ) قلي ترى دي دعاية لهم شوف انا رحت كلمتكـ ودحين سمعت ايكيا عندكـ فوق بسبب دا التعامل
    انا اعطيكم مثال لو واحد سألني مين افضل هايبر بندة ولا أي سوبر ماركت انا راح اقول هايبر لأن خدمة العملاء عندهم ممتازين وكذا تزيد سمعة المحل
    دا الموقف اعطاني بعض الدروس

    1. اذا انخرب اي جهاز راجع الضمان حتى لو الضمان انتهى مشكلتنا ما نحب نجرب على طول نقول الضمان انتهى وما نجرب
    2. من تجربتي الهايبر بندة أفضل الأسواق في السعودية ربما لأنه لايتعامل مع المنتجات الدنماركية كما قالت الأخت مضيعة

    Posted by الإعصار الأحمر @ 12:03 م

    Tags: , , , ,

6 Comments to قصتي مع فلاشات سوني

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*

Subscribe without commenting