يوميات

قصتي مع استخراج التصريح في دلة

37 تعليقات

قبل شهر جيت ابغى اطلع تصريح طبعاً في جدة ما في تصريح الا لمن تدرس في دلة

المهم رحت دلة مع ولد عمي واخويه
في اليوم الي قبل الأخير في الإختبارات

طبعا اول شيء لمن جينا ندخل السكيورتي وقف في وجهنا قال اش تبغو < << واحد داخل دله يعني اش يبغى ؟؟؟؟
المهم قلتلو ابغى اطلع تصريح
قلي والي معاك ؟؟؟؟ < <<< العن ام اللقافة
داك الوقت اتدخل اخويه وقال كلنا اخوانوا < << كدبة بيضة

المشكلة انا واخويه نحاف وولد عمي شوي دبه مدري كيف زبطت الخرشة
وبعدين رحنا محل بداخل دله عشان نشتري ملف < << انا نفسي اعرف اش يسوو بالملف العلاقي
وبعدين
دخلنا ورحنا للكاونتر اعطاني رزمة اوراق عشان اعبيها >>> املأ الفراغات التالية
كل ورقة احط فيها اسمي وهويتي < << مدري ليش ثلاث اوراق كلها نفس المعلومات
المهم انا نسيت اجيب قلم معايه
حصلت واحد جنبي قاعد يعبي بياناتو لمن انتهى طلبت منه القلم
المهم وبعد ما خلصت رحت لغرفة للعيادة الصحية حق دله عشان كشف النظر

دخلت الغرفة احسب قياس النظر بالكمبيوتر < << مسكين متعود على الأجهزة الإلكترونية
إلا الدكتور يقلي اقعد وطالع فين الفتحات في الدوائر
بعدين خلصت وطلعت راح ختم على ملفي < < الأزرق العلاقي
وبعدين ختملي واحد تاني في مكتبوا وكلها عليها شعار وزارة الصحة
ورحت عشان اختبر اختبار تحديد المستوى
قالولنا روحو مظلة رقم 5
طبعا مايسمحوا إلا فقط بالطالب لوحده وعاد تشوف اخوي يعطينا نصايح ضمن الأبواب والبس الحزام وقفل الشبابيك > أما شبابيك هدي خرشة
حصلت مجموعة قبلي وقاعدين
قعدت معاهم ادور على الشرطي مو موجود
طبعاً بعد الإنتظار ربع او نص ساعة جا الشرطي
وبدأ يختبرنا أنا مدري كيف سرت الخامس < < طبعا بالغش
أول مرة اخذ الشرطي اربعة للإختبار
الأول كانت عنده مشكلة في الملف
فدخلت مع المجموعة

الي قبلي مشي مزبوط بس في النهايه لمن وقف سحب البريك فحطت السياره

هههههههههههههه
هو طلع خايف وقال والله مو قصدي افحط < << لا منجد
في احد يفكر يفحط وهو يختبر عند شرطي
المهم أنا ركبت
مسوي اني فاهم ربطت الحزام بس للأسف اكتشفت انو في مشكلة في الحزام انو شويه مأكول < << مدري ليش ؟؟؟
وبعدين مشيت بشويش وعلى الأول < << طبعا مسوي نفسي مؤدب
قلي حطو على التاني وبعدين قلي وقف
وخلاص كده خلص الإختبار < << مو تحسو انو فله الإختبار
وبعدين لسه ما خلصت لازم اسجل في المدرسة عشاني بأطلع تصريح
رحت اخذت رقم وقعدت انتظر بس كان قبلي اكثر من 100 واحد
طبعا بما انو راح ياخذ وقت عبال ما يخلصو ال100 لازم استغل وقتي
قلنا خلينا نروح نفطر
اخويه جواله بوكيت مدمج معاه جي بي اس GPS < << تحديد المواقع
راح قلنا انا ادورلكم على مكان نفطر فيه
المهم طلعلنا اقرب مطعم فاست فود اسمو المدينة قلنا مادام طلع في الجي بي اس لازم يكون ممتاز
عاد مشينا مع الجي بي اس وهو يقلنا كيف نروحلو < << بصراحة مرررة مريح وفله
المهم في النهايه رحنا فطرنا عند بوفيه الأمانة لانو طلع ده اللي اسموا المدينة محل حق رز ولحم < << بصراحة مدري كيف كان شكلو مرررة منتهي
طبعاً هدي كانت نهايه الجي بي اس

وبعد ما خلصنا رجعنا بسرعة لدله
عشان اطلع موعد الدراسة
رحت حصلت الرقم 102 وانا رقمي 60 أو 70
عاد قلت راحت عليك عامر يبالك تاخذ رقم جديد
قلت خليني اجرب اعطي للسكيوريتي الي ينظم المتقدمين
طلع انو سار خطأ عندهم ودحين بيرتبو الناس على الكراسي
المهم دخلني بسرعة على الكاونتر
طبعاً بعد ما دفعت 430 ريال
وحطلي اقرب موعد بعد شهر

بعد شهر …………..

المشكلة دحين الدراسة في ايام المدارس ومن 5 لين 10

نبذة عن الدراسة في دلة
أول شيء حسب اختبار تحديد المستوى
اذا اخذت :: أ ::
اظن عليك أنك بس تحضر دورة للاشارات وتحضر اختبار نهائي
وبعدين اذا نجحت تاخذ الرخصة
طبعا بس للي بيطلعو رخصة فقط

اذا اخذت :: ب ::
تدرس 5 ايام وبعدين تختبر
وبعدين اذا نجحت يا تاخذ الرخصة أو التصريح حسب عمرك
فوق 17 تاخذ تصريح وفوق 18 تاخذ رخصة

اذا اخذت :: ج ::
تدرس خمسة أو سته اسابيع
هدا للي ما يعرفو يسوقو السيارة من الأصل
يعلموك كيف تسوق من الألف للياء
وبعدين تختبر واذا نجحت تاخذ التصريح أو الرخصة

طبعا الي بيطلع تصريح لازم يدرس وما ياخذ في اختبار تحديد المستوى الا :: ب :: أو :: ج ::
الإختبار النهائي أو اختبار تحديد المستوى لازم يكون في الصبح

مواعيد الدراسة
الفترة الصباحيه
من 7 ال3
الفترة المسائيه
من 5 الى 10

أنا بما انه ايام مدرسة اخذت الفترة المسائي

أول يوم تمرين الكوبري او الطلعة
تطلع مرتفع وبعدين توقف السيارة وبعدين تحركها
بدون ما ترجعها للخلف
أنا جبتو من اول مرة >> تكفى وش نسويلك طيب

اليوم الثاني تمرين الإكس
المخطط على شكل اكس ولو مخرج ومدخل
تدخل السيارة وبعدين تخرجها بالريوس يعني تحطها على الـ R وتمشي للخلف وتخرجها
طبعا في هذا التمرين لازم تلف راسك وتطالع على ورا وتمشي أو تطالع من المرايات

اليوم الثالث
تمرين الثمانية
المخطط على شكل رقم ( 8 )
عبارة عن دوارين متصلين مع بعض
به مسار واحد أقل من المسارات الموجودة في الطرق السريعة بحوالي خطوة يعني يادوب تمشي السيارة
طبعاً في هذا التمرين لازم ما تدق أو تطلع فوق الرصيف
بصراحة هذا التمرين اعتبروا أصعب تمرين

اليوم الرابع

تعيد تمرين الإكس والثمانية

اليوم الخامس والأخير
تعيد تمرين الكوبري والثمانية

نجي لدراستي
أنا بصراحة كنت داخل دله بس كده عشان التصريح < << يعني مو مهتم بالدراسة
وعلى اساس أخويه قلي الإختبار بس تمشي السيارة

اليوم الأول جيت زي الشطار < < دايما أنا مؤدب وشاطر
على الساعة 5 العصر
دخلت الميدان قاعد ادور لوحات ارشادية أو احد الموظفين
يجمع طلاب اليوم الأول < << على بالي إني في مدرسة متطورة
رحت ادور وامشي في الميدان حصلت عامل < << هذا الوحيد الي كان موجود
سألتو أول يوم فين يروحو ؟؟؟
اشرلي على المبنى وقلي روح للداخل < < يصرفني
رحت وانا داخل حصلت واحد من المدربين
اقلكم على حركة عندهم أي مدرب يكون لابس البالطو حق الدكاترة
المهم سألتو أول يوم فين يروحو ؟؟
قالي روح مظلة رقم اثنين

طبعا مشيت لين مظلة اثنين حصلت ناس كتير
قعدت معاهم انتظر بعد عشرة دقايق جاء مدربين
المهم قسمونا لمجموعتين
كل مجموعة حوالي 20 واحد < < عشان بندرس خمسة ايام فقط
المدرب الي معانا كان مصري
بدأنا في التمرين الأول لين الساعة سبعة وربع

بعد التمرين
تجي قاعات
بالتناوب يوم ميكانيكا ويوم اشارات
أول يوم كان ميكانيكا
طبعا يقعد يشرح المدرب ونص الطلاب مو معاه

اليوم الثاني زي اليوم الأول بإستثناء اني اول ما جيت رحت على المكان ما قعدت احوس

اليوم الثالث
بصراحة كان مأساة بالنسبة لي كمحترف سواقة < << تكفى ياشوماخر
دا اليوم كان تمرين الثمانية
أنا جيت واثق من نفسي مشيت دخلت الثمانية وفي الدوار الثاني الا ما احس الا السيارة طالعة الرصيف < << المشكلة مو مني المشكلة من السيارة <<< عاش المصرف

المرة الثانية برضو نفس المكان احك في الرصيف

خلص اليوم وانا ما قد جبت التمرين مزبوط

اليوم الرابع
برضو تمرين الثمانية ماجبتو < << الأخ خلاص تحطم
طبعا أنا قاعد ارفع معنوياتي
اقول ترى ما راح يختبرونا في اي من هذه التمارين بس تمشي بالسيارة وتوقف

اليوم الخامس
أول مرة لمن اتمرنت على الثمانية طلعت فوق الرصيف عند الخروج

بس المرة الثانية

جبت التمرين بدون ما اطلع فوق الرصيف أو أي شيء
طبعا انا فرحت < << إحساس باسترجاع الكرامة المجروحة

بعد صلاة العشاء
في محاضرة الإشارات
طبعا المدربين ما يقصرو
قالولنا على اختبار الإشارات اش نسوي فيه
أول شيء الإختبار بالكمبيوتر < << التطور والتقدم والتكلنوجيا
لا وكمان باللمس < << عاد كده انا ما صدقت لين ما شفت بعيوني

الإختبار عبارة عن 20 سؤال
اول عشرة اذا غلطت فيها ترسب على طول
والعشرة الثانية
بس تحل خمسة منهم

العشرة الأولى ثابته < << يعني انكـ ناجح
طبعا قالولنا المدربين الاشارات العشرة الأولى
وهي


علامة قف
وعلامة ممنوع الدخول
وعلامة ممنوع الوقوف والإنتظار
وعلامة ممنوع الإنتظار
ولمن تكون الإشارة حمرة
ولمن تكون الإشارة صفرة
ولمن تكون الإشارة صفرة بس متقطعة
وعلامة مسموع التجاوز < << في الطريق
وعلامة ممنوع التجاوز < < برضو في الطريق
وافضلية السير تكون لمن ؟؟؟ بداخل الدور

الأسئلة سهلة يعني اغلبهم ناجحين

يوم الإختبار

دا اليوم أنا صليت الفجر وعلى طول ابويه وداني دله < << انا مكلمو خليني انا اروح وارجع لوحدي
بس يقلي أنا ما اضمنك < << اش رايكم مو تحطيم لمحترف مثلي

رحت حصلت عسكري قريب من البوابة
دخلت حصلت كم واحد موجود
قعدت انتظر
بعد كم دقيقة بدؤو يجو اصحابي البقية < < الي كانو معايه في الدورة
على الساعة سبعة وربع فتحو البوابه ودخلنا

بعدين ودونا على غرفة من الغرف < < طبعاً الميدان 2 الي فيه الإختبار فيه بدل المظلات غرف مكيفة
وكل واحد اخذ ورقة الإختبار

وبعد نص ساعة تقريباً جا دورنا
في السيارة كنا اربعة
أول واحد كان مصري
هو كانت عندو رخصة مصرية ولما جا يطلع الرخصة السعودية رسب
ودرس معانا
المهم أول شيء قلو ادخل الإكس
سوا التمرين بس في النهاية ما دخل السيارة مزبوط < << ما حطها في نص المدخل

وبعدين قلو يدخل تمرين الثمانيه
طبعا هو قاعد يسوق طول الوقت يرتجف والسيارة صوتها يعلى ويرخى
في تمرين الثمانية ما طلع في الرصيف ولا شي وخرج مزبوط بس زي ما قلت
صوت المكينة عالي وتحرك السيارة مو مزبوط
لمن خرج وهو بيسوق الشرطي سألو انته كيف اخذت الرخصة المصرية ؟؟؟ اختبرت ؟؟
الأخ قلو بصراحة أنا أخذتها بدون ما اختبر
الشرطي قلو بكم بعشر جنيه
الأخ قلو بصراحة بميتين جنيه
في النهايه الشرطي حطلو راسب بسبب ضعف في التحكم
طبعاً المصري قاعد يترجاه
قلو أنا اشتغل ومشغول ما اقدر أجي ادرس
واعتبرني أخوك مصري
وووو ……
الشرطي جاوبو < << بصراحة اعجبني الجواب
نحن مافي فرق عندنا بين السعودي وغير السعودي
وما يطلع عندنا احد من الباب الا وهو يعرف يسوق

ثاني واحد
أول ما ركب قلو ادخل التمانية < << مدري ليش عاجبتو

وبعدين جا دور الثالث
برضو خلا يدخل الثمانية < << وانا ادعي انو ما يدخلني التمانية زيهم
وقفو في ربع الثمانية وقلو خلاص انته ناجح

بعدها جا دوري
طبعاً ركبت وربط الحزام < < مؤدب
مشيت وخرجت من الثمانية < < طبعاً حمدت الله اني ما دقيت الرصيف
قلي بعدين روح للموقف < < عشان خلاص نخرج لأني آخر واحد
طبعا مريت بإشارة قف
ما انتبهت إلا عند النهاية
طبعأ حطيت رجلي على الفرامل
عاد كلهم راحو على قدام < << جا يكحلها عماها
قلي خلاص لاتوقف ولا شيء امشي خلاص < << يبغى ينفك مني

بغيت اقلو السلامة أولاً واتباع اشارات المرور ثانيا بس خفت يحطلي راسب

طلعت بعدين رحت عشان اختبر الإشارات
طبعا وانا طالع قاعد اسب اخويه الي ضحك عليه
دخلت انتظر الدور < << طبعاً الإختبار زي ما قلت على الكمبيوتر
بعد 10 دقايق جا دوري
وقفت على الجهاز
طبعاً الأسئلة كلها قد قالولنا هي
جاوبت ونجحت < << دايما ناجح خخخخخخخـ
وبعدين خلاص قالولي روح بعد يومين تعال عشان التصريح

أنا خرجت ورحت ركبت تاكسي < < ابويه ما كان مقتنع اني راح انجح
ورحت المدرسة
مع اني ما كنت أبغى اروح < << اجل في واحد يحب يروح المدرسة
بس اش اسوي الرياضيات

وكذا تكون انتهيت من من القصة
توتة توتة خلصت الحدودة حلوة ولا بنتوته < << غباااااااااااار كح كح

طبعا حبايبي انا ما حطيت القصة عشان تتونسوا وتضحكوا بس المقصد الاول والأخير لو واحد فيكم فكر يروح دله عشان يطلع رخصة او تصريح يتعلم من هذي القصة ولا يكون غشيم زيي مش عارف ايش يسوي >>> تكفىىىى

الإعصار الأحمر

37 تعليقا على “قصتي مع استخراج التصريح في دلة”

  3. من ويكيبيديا، الموسوعة الحرة
    اذهب إلى: تصفح, ابحث

    تويوتا ريوسالسيارة هي مركبة آلية تتكون من مجموعة من الاجزاء الميكانيكية تعمل كل هذه الاجزاء بصورة متناسقة بحيث يؤدي على جزء الدور المخصص له لتحريك هذه المركبة، تعتبر من وسائل النقل الأكثر انتشارا في عصرنا الحالي .

    السيارات تنقسم إلى عدة انواع منها الصغيرة ، واكثرها يستعمل لتنقل من مكان إلى اخر ، ومنها الكبيرة الشاحنات التي تستعمل لنفل البضائع ، وهي بذلك تعتبر العنصر الاساسي في الدول الصناعية في دفع عجلة الاقتصاد إلى الامام ، تعمل السيارة على المحرك ، أول انتشار للسيارات كان في اوئل القرن الثامن عشر و لكن الاكتشاف الحقيقي للسيارة يعود إلى اواخر القرن السابع عشر ميلادي حينما صنع جوزيف نيكولاس أول نموذج لسيارة تعمل بالمحرك سنة 1769 ميلادي.

    السيارات هي مركبات لنقل الركاب تتحرك علي عجلات حاملة المحرك الخاص بها. معظم التعريفات لهذا المصطلح تحدد أن السيارات مصممة للتحرك علي الطرق المجهزة (المسفلتة), و بها أماكن لجلوس من شخص لسبع أشخاص, و في العادة تسير علي أربع عجلات, و أنها مبنية لنقل الركاب و ليس البضائع. و لكن المشكلة أن المصطلح نفسه غير دقيق.

    في عام 2002, كان هناك 590 مليون سيارة ركاب في العالم (أي سيارة لكل احدى عشر شخصاً تقريباً), منها 140 مليون في الولايات المتحدة (أي سيارة لكل

    رد

  4. أول مرة لمن اتمرنت على الثمانية طلعت فوق الرصيف عند الخروج

    ههههههههههه

    احب ابلغك والله اني جلست اكثر من مره اعمل تحديث للمدونه على هالموضوع

    بالاخير لاحظت ان المدونه غير متوافقه بنسبه 70 او 60 مع الاكسبلولر وبحكم عملي لازم انزل تحت لاخر شي علشان اشوف الموضوع

    بس من جد القصه ممتعه هههههه :n:

    رد

  5. النساء

    انا جربت بـ IE 7
    وكل شيء تمام

    المشكلة جهازك فيه IE 6
    والإكسبلور 6 ما يتوافق مع اغلب المواقع بسبب اخطائه الكثيييييرة

    حدث الوندوز أو نزل آخر اصدار من متصفح الإكسبلور ويسير كل شيء تمام :)

    رد

  6. :dg: :dg: :dg: :dg:
    انا توي طالع من دله وابشركم ناجح من اول مره..

    بس والله انها دوووووخه..والله العضيم كاننا نشحدهم الرخصه شحاااده..

    رد

    2. اذا بطلع رخصه ف الشميسي تجي اول يوم تقدم تجيب معك ملف علاق و صور لك وصورتين لل البطاقه ويعطونك اوراق تعبي بياناتك والتصريح نفسو الزبده تروح الميدان وتمشي السياره شوي هذي سهالات صاحب الرخصه يكون ياخذ محاظره للاشارات ساعه او شي زي كذا اما التصريح دوره ٥ ايام وبعدو محاطره وبعدو الاختبار تجي اليوم الثاني تاخذ الرخصه او التصريح بس الشميسي في مصاريح كويسين وفيه ناس معفنه المدربين اللي مرو علي زي العسل وربي لك اللي عند المكتب كم واحد يجيبو لك المرض بنسبه لهل التصريح يعطونك السند وورقه عقت التقييم تروح المظلات بعدين تعطيها المدرب وتنتظر دورك ويناديك اول شي تربط الحزام وتسمي بالله وبعدها تسال ابد ؟ اذا قلك يالله يالله وع وجهككك مكروف ٥ ايام ????

      رد

    3. اذا بطلع رخصه ف الشميسي تجي اول يوم تقدم تجيب معك ملف علاق و صور لك وصورتين لل البطاقه ويعطونك اوراق تعبي بياناتك والتصريح نفسو الزبده تروح الميدان وتمشي السياره شوي هذي سهالات صاحب الرخصه يكون ياخذ محاظره للاشارات ساعه او شي زي كذا اما التصريح دوره ٥ ايام وبعدو محاطره وبعدو الاختبار تجي اليوم الثاني تاخذ الرخصه او التصريح بس الشميسي في مصاريح كويسين وفيه ناس معفنه المدربين اللي مرو علي زي العسل وربي لك اللي عند المكتب كم واحد يجيبو لك المرض بنسبه لهل التصريح يعطونك السند وورقه عقت التقييم تروح المظلات بعدين تعطيها المدرب وتنتظر دورك ويناديك اول شي تربط الحزام وتسمي بالله وبعدها تسال ابد ؟ اذا قلك يالله يالله وع وجهككك مكروف ٥ ايام ????

      رد

  9. هههههههههههههههههههههههههههههههههههههههههههههههههههههه ..

    ياخي ماشاء الله عليك دمك زي العسل وربي انا اقرأ وميت من الضحك .. الله يحميك

    هههههههههههههههههههههههههههههههههههههههههههههههههههههههه

    اوكي دحين حروح اقدم ع الرخصه وبصراحه استفدت منك فألف شكر ياغالي ..

    تقبل مروري ..

    رد

  10. سبل كيفكم ادعولي بكرة إختباري الله يستر (مجموعتي كلهم متخصصين ارصفة)الله يستر يجي العسكري ويقول ببوني اريحكم انتو راسبين :bn: :bn: :bn:

    رد

  11. هههههههههههههههههههههههههههههههههههههههههههههههه وربي كاي قصة روعه والله يخلي مدرسة الشميسي لقيادة المركبات كلو دف ههههههههههههه انا خلاص درست 4 ايام بكره السبت اختبار وان اشاء الله انها تتيسر والاشارات نفس ماقال المدرس واخوي كمان طلع رخصه نفسها اسئلة الاشارات ~ دعواتكم يا اخوان

    رد

  12. الحمد لله والشكر يآرب اختبرت وطلعت نآجح ما انو طفت علي هههههههههـ :gl: ؟,,
    لاكن العسكري مو دآري عنك وبدون تقيم ولا اي حاجه شغل وادخل الاكس والثمنية ووقف بس وهو يوقع لك نآجح ,,
    انا الحمد لله تمام بس في القومه ه ه لك عليهآ :t: لاكن ماهي مهمه اهم شئ مشيك تمام والريوس والدخول والخرج ,,
    المطلوب تقيم على القومه وعلى التعشيقه واشياء كثير لاكن الشميسي لا مافي كذآ على يوقع لك ناجح الحمد لله تيسرت ,,
    وبعدها دخلنا على اختبار الاشارات ,, نفس ماقلت ونفس ما قال اخوي ونفس الي حددها المدرس حق مدرسة الشميسي ,,
    علامة قف
    وعلامة ممنوع الدخول
    وعلامة ممنوع الوقوف والإنتظار
    وعلامة ممنوع الإنتظار
    ولمن تكون الإشارة حمرة < قف
    ولمن تكون الإشارة صفرة < تهيأ للوقوف
    ولمن تكون الإشارة صفرة بس متقطعة < هدي السرعه
    وعلامة مسموع التجاوز < << في الطريق
    وعلامة ممنوع التجاوز قطعياً < < برضو في الطريق
    وافضلية السير تكون لمن ؟؟؟ بداخل الدور

    لازم تجيب 10 الاولى ولاتغلط في اي وحده عندك 30 دقيقة على مهلك لاتستعجل اول عشره على مهلك فيها وسهله مايحتاج هي الي فوق انا كاتبها
    الاجبارية عشره لازم تجيبها صح بعدها راح يجيك كمان 10 ثانية تجيب منها 5 فقط وتنجح وهذه عادي لو غلطت فيها وتقدر تسوي تأجيل السؤال ثلاث مرات فقط ,
    الحمد لله انا سويتها اقل من 5 دقايق سهله مايحتاج :f: ,,
    بعدها دفعت المبلغ الي هو 100 ريال حق التصريح الي بطلعه غير 435 حق المدرسه ,, واليوم الثاني تاخذها ,
    لك الحمد والشكر يآرب , , ,
    والله يخلي التوماتيك ;)
    تحيـآتي لكم جميعآً وآسف ع الإطآله لاكن للفايده لكم ,,
    بييس

    رد

  13. مشكووووور اخوي على القصه

    انا دخلت الدله وعلى سيارة توماتك كمان :cv:

    الحمد لله نجحت في اختبار القياد :gl:

    بس المشكله رسبت في اختبار الإشرات في العشر الاسأله الاولى وتحديدا في السوأل العاشر كانت الإجابه الصح (التقاء الطريق بأخر فرعي) واعطوني موعد بعد شهر :bo:

    بس الحمد لله بس باقي بعد بكره واروح الدله والله كأني اشحت التصريح

    الله يعين دعولتك :cry:

    ياااااااااااااارب انجح

    ومشكور عـ الإشرات

    رد

  16. هآآآآآآآآآآآآي

    مبروك عقبآلنا .. :s:

    انا سجلت وبكرة اليوم الثآآآلث لي << صكوني بـ 5 آياام << لاني اكلت وشربت الرصيف

    خخخخخ يااخي والله احس اني طآآرهـ .. بس اذا دخلت الميدآآن << اعلووم :(

    وخوووف في الـ & ..

    خاايف ارسب والله عيب .. امتحنت الوآآلد لين عطاآآني المفتااح << والحين ارسب ؟ :5g:

    الله يستر بس .. (( الله كريم )) << واذا رسبت رمضان كريم ..

    رد

  23. جزاك الله الف خير
    الصراحة مرررررررررة افدتني
    وكل مااقرا القصة قبل مااروح دلة يقل توتري
    لاني اكون عارف حروح وايش اسوي بالضبط

    وابشرك تصريحي حيطلع بكرا ان شاء الله :k:
    والحمدلله

    وتسلم ماقصرت

    رد

  25. هههههههههههههههههههههههههههههههههه والله اياااااام انا الحين في عام 2015 والموضوع عام 2008 يعني يوم كان عمري 10
    والحين انا باطلع تصريح عشان عمري 17
    شوف كيف الايام تمشي بسرعه يا صاحب الموضوع

    رد

  26. السلام عليكم و رحمة الله و بركاته

    كيف حالك الشباب بصراحة موضوع حلو وصاحب الموضوع ما شاء الله عليه دمه خفيف انا يا شباب مثل ما اشوف كبير شوي بس إن شاء الله نحاول ناخذ الرخصة اشوف اللي يقول عمري 18 و 17 انا اشوي شايب اقتربنا من الاربعين و ترا ما عندي رخصة كنت اسوق قبل كم سنة كابرس بوكس 85 بس بطلت تدروا عاد شغلات ساهر و غيرها هذا غير ان ما عندي رخصة بعد النظر ضعيف الحمد لله على كل حال في ناس قالوا لي تقدر تأخذ رخصة مقيدة يعني توماتيك و قيادة فقط في النهار و هذا اللي احتاجه بين العمل و البيت و الجوازات وغيرها و كلها و الحمد لله في الفترة الصباحية يعني و الشمس ما غربت لكن رحت مدرسة شمال الرياض اللي جنب الهلال الاحمر مخرج 4 قالوا العساكر في الحج روح دلة اللي في التخصصي مشيت بس بصراحة نظارتي كبيرة مجرد ما شافني المسؤول عن الميدان لتحديد المستوى قال احتياجات خاصة نظري ضعيف بس اللي اعرفه انا الاحتياجات الخاصة و ضعهم غير المهم ركبت مع المدرب توماتيك بس مجرد ما تحركت مع اني صراحة تدربت قبلها مع مدرب متخصص في تعليم القيادة مو وقت كثير بس استفدت و الحمد لله رب العالمين حتى الريوس لمسافات ظبطه معي لمسافات و الحمد لله رب العالمين أول ما ركبت قالي لا شكلت ما تسوق مع اني كنت اسوق من غير رخصة وقبل ما اروح دلة بعد تدربت مع المدرب واول ما تحركت وتحديد المستوى سهل مجرد تحرك ولف من الدوار و ارجع قالي على ما اظن شهر في شباب قالوا روح مرور السلي اسهل بس ما ادري هل ممكن بعد يعطوني شهر لاني بصراحة اقدر اتدرب خمس ايام بس ما ادري ويش رايكم

    رد

  28. ب النسبه ل الثمنيه اسهل شي تدخل ع ما اظن من اليمين وتكون السرعه ٢٠ او ٢٥ وقبل كل شي سم بالله واذكره وادعي دعاء الصعايب اللهم لا سهلا الا مرجعلته سهلا وانت تجعل الحزن اذ شت سهلا

    رد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*