ليلة العيد بعد صلاة العشاء كنت رايح سوق حراء الدولي اشتري طاقية ( كوفية ) صحيح انو عندي وحدة بس كنت ابغاها تسير اثنين بالإضافة كنت ابغى اروح للحلاق عشان ازبط شوشتي

المهم مشيت في طريق المدينة الا شويه اشوف دخان ابيض يطلع من العادم ( الشكمان ) وكل شويه يزيد في النهاية وقفت وقفلت السيارة وخرجت اشوف ايش الهرجة الدخان كان اختفى رجعت شغلت السيارة طلع الدخان مرة تانية انا داكـ الوقت كنت مرررة متوتر عاد اول مرة توقف عليه السيارة لوحدي خرجت برة السيارة شوية جالي واحد شباب قلي تبغى مساعدة طبعاً شكرتو وقلتلو ابوية جاي دحين وبعد شوية جاني واحد قالي انو ميكانيكي وقلي اصلحلكـ هيه دحين اذا تتصلح قلي روح جيب علبة زيت وموية من المحطة القريبة بعدين هو طلع معيار الزيت وشافو حصل زيت مع موية قلي الرؤوس انضربت
وبعدين قلي السيارة كانت حرارتها عالية قلتلو لأ كانت الحرارة اعلى من النص بشوية( بعدين طلع عداد الحرارة فيه مشكلة ) .
بعدين قعد يفتح البواجي فتحها وقلي شغل السيارة شغلتها على طول طلع من فتحات البواجي موية مع زيت + دخان  قلي البساتم ساحت
المهم بعدين قلي ما عندكـ الا انكـ توضب راس المكينة او انكـ توديها للتشليح وبعدين راح
جا ابوية قلي اشبها انا بإبتسامة صفرة قلتلو المكينة خبطت قلي كيف قلتلو مدري بس انا في الظهر شيكت على الموية وكانت تمام ( السيارة في الأيام الأخيرة سارت تشرب الموية شرب يعني كل يومين لازم تعبيها موية ! )
رحنا جبنا ونش وسحبنها للصناعية على اساس اليوم ( السبت ) يشوفوها
السيارة اصلاً مهلوكة اخوية الكبير اتعلم عليها وبعدين انا اتعلمت عليها وبعدين توأمي يعني حالتها حالة واتوقع عمرها الإفتراضي خلص هية كامري موديل 93
ابوية من بداية الإجازة يقلي شوف سيارة عشان تروح بيها الجامعة عاد انا كسلان مارحت ولا معرض
بس دحين حطيت عدة سيارات في بالي وراح اشوفها بعد ما يخلص العيد واقرر  افكر ان النوع تكون صغيرة زي الكرولا تقريباً

يوم العيد دايماً كل عيد بعد الصلاة نروح لبيت جدتي ( من جهة ابوية)
ويكون هناكـ الفطور وبعد الفطور تجي العيديات
وتقريباً على الساعة 11:30 يبدؤو يروحو  انا بالنسبة ليه انتظرت لين الظهر وبعدين على طوووول على المخدة

امس كانت عندنا عزومتين وحدة من جهة امي والتانية من جهة ابوية طبعاً انا يوم العزومة
نحن اش سوينا  اول شيء رحنا عزومة اهل امي لأنهم يخلصو بدري قعدنا لين ما خلصو العشا ( طبعاً اتعشيت بس ما كلت مررة مزبوط يعني بقيت شوية للعزومة التانية ) وبعدين رحنا لعزومة اهل ابوية (الي هم اعماي + أولاد عم ابوية وناس من المعارف )

في الطريق كنا ماشين في طريق النزهة ( بين المدينة والخط السريع ) المهم في نص الطريق اشم ريحة مجاري (الله يكرمكم ) قلت شكلو في وايت صرف جنبنا تلفت ماحصلت وايت طالعت فوق حصلت سحب على طول الطريق ! سحب فوق السيارة بـ متر او مترين !!!  سحب من الصرف الصحي ( منجد جدة في حالة يرثى لها لا موية تحلية مزبوطة والصرف الصحي اصلا مو موجود )

وصلنا كانو لسه ما حطو العشاء  لمن حطو العشاء انا قعدت معاهم ( عكس اخواني الي ما اكلو ) قلت بآكل شوية طبعاً ما كلت شوية دا بس كلام انا في العزومة الأولى شربت ميرندا برتقال ودي العزومة شربت اول شيء بيبسي بس تعروفو واحد ما يكفي قلت خليني اجرب بيبسي ماكس ( ما قد شربتو كل ما اشوفو اقول البيبسي العايدي الز ) كم واحد من اولاد عمي قالولي زي العايدي وانا مسكين على نياتي شربتو بس طلع زي الدايت ناصبين على الناس يقواواكـ مافي فرق مجموع البيبسي الي شربتو داكـ اليوم واحد في الصبح وواحد في عزومة اهل امي و3 في عزومة اهل ابوية يعني 5 ، 3 منها بيبسي والباقي اشياء تانية

العزومة كانت امس اليوم انا صايم وبدون سحور وحتى العصر ماحسيت بالجوع بس عطشااان وعندي نوووم