يوم الخميس 6 رمضان ( 27 أغسطس ) في الليل اكتشفت ان مروحة لابتوبي لا تعمل !! وبذلك كان الجهاز ينطفي على طول ( يقعد تقريباً 10 دقايق وبعدين ينطفي )
الجمعة جربت اشغل الجهاز اشتغلت الروحة بس طلعت ريحة التماس كهربة فقفلت الجهاز
السبت وديت الجهاز لمركز الصيانة التابع لوكيل HP في السعودية ردجنتن REDINGTON في شارع فلسطين
يوم الاحد اتصلت عليهم قالو لي المروحة انحرقت يبغالها مروحة جديدة والعملية تاخذ 15 يوم تقريباً عشان جهازك تحت الضمان !!
سألتو طيب في رقم لخدمة العملاء قلي مافي !!
انا طنشتو ورحت موقع HP حصلت صفحة لأرقام خدمة العملاء في الشرق الأوسط
اتصلت على خدمة العملاء وقلتلهم الحكاية كلها
طلع المروحة مهي موجودة !! والمروحة تاخذ غالباً من اسبوعين الى 3 أسابيع وهيه راح تجي من الشركة الأم لدبي وبعدين لجدة
ولسه ماطلع عندهم متى الوصول
يوم الثلاثاء ( بعد يومين من تسليم الجهاز ) اتصلت عليه موظفة خدمة العملاء وقالتلي تقدر تروح الضمان يعطوك جهاز لين يتصلح جهازك
ملاحظة:
في ميزة في خدمة عملاء HP اذا تقدمت بشكوى واتصلت عليهم مرة تانية تتحول لنفس الموظف الي رد عليك اول مرة
يعني مايحتاج تقعد تشرح مشكلتك من جديد ، ايضاً الموظف مايقعد يفتيك في شيء ما يعرفو او مهو متاكد منو ، شيء ما يعرفو يقلك انتظر ويكلم الدعم التقني
انا افتكرت في مشكلة عندي في منفذ HDMI حق الفيديو لمن توصل التلفزيون بالابتوب تطلع الشاشة الزرقة ويعيد التشغيل !!
فكلمت الوكيل قلي تجينا بعد ما تتصلح المروحة !! ونشوفو << يعني اتلطع اسبوعين كمان !
رجعت لخدمة العملاء وكلمتهم على المنفذ قالولي هم يشوفو الموضوع
وبعدين اتصلت عليه الموظفة وقالتلي الوكيل ما عندوشاشة فيها دا المنفذ فما يقدرو يعرفو اذا كان المنفذ شغال ولا لأ !!!!
ممكن تجيب شاشتك عشان يتأكدو من ان المنفذ فيه مشكلة
انا طنشت موضوع المنفذ
السبت الي فات ( 12 ستمبر – 22 رمضان ) وصلت المروحة للوكيل
قبل امس الاحد استلمت الابتوب 
فوائد استفدتها من التجربة:
- اتصل على خدمة العملاء للشركة عند عدم رضاك عن صيانة جهازك
- خذ نسخة من ملفاتك التي تحتاجها عند تسليمك جهازك للصيانة
وكل عام وانتم بخير مقدماً
مبارك تصليح الجهاز
بس غريبة المروحة انعدمت مرة بسرعة
عموما أجهزة hp دايما مروحتها فيها مشكلة .. أعرف كتير عندهم hp مروحتهم دايما تنعدم ..
ممكن تستعمل المروحة الخارجية اللي ينحط عليها الجهاز ..
حلوة الخبرة اللي استفدتها
…
اول اعرف انو مراوح HP تنخرب بسرعة
بس على فكرة المروحة الخارجية ما تفيد اذا مروحة المعالج انحرقت
يؤ يؤ الحمد لله على سلامة جهازك وعقبال إلي عندي إن شاء الله
أنا المروحة كمان فيها مشكلة بسلامتها كم فترة اعتقد لأنه صاير يسخن مره
المهم النتيجة بداية رمضان طلعت لي الشاشة المميتة بعد ما نصبت الفوتوشوب
وآه بس .. حبيت اوديه للصيانة بس وقت دوامهم صعب في رمضان
عرضته على اكثر من شخص قالو لي كرت الشاشة انضرب
ولو وديتوه لصيانة الشركة بيغيرون المذربورد كلها O_o
يعني ياليييييييييييييل ما اطولك
مو عارفه ايش اسوي صراحة إذا بيكلفني حوالي الألفين ريال وهو ما له إلا سنة ونص تقريبا
قهرررررررر
):
خدمتهم حلوووهـ مآشاء الله
أمآ من نآحية نسخة من جهازكـ / ايه لآزم والا بيروح كل التعب والأشيآء الثمينه
مبروكـ رجعت الجهآز
اخوي ممكن تفيدني عن موقع شركة hp بالتحديد لاني من سكان مكة
وجهازي عطلان يصل معاانخرب فيه كرت الشاشة وموديل الجهاز hp paviilion dv 27500 وودي اغيرله مذربورد كامل
ياريتك تتواصل معي واكون لك من الداعين رقم جوالي 0558345198
اخوي أنس اتصل على 8008971415
دا رقم خدمة العملاء حق HP
انته كلمهم على المشكلة وهم يحلولك هيه او يقولولك اقرب وكيل
يعني بالعربي مايخلوك تقفل السماعة الا وانته عندك الحل
اخوي عندي هذا الرقم للدعم الفني ل hp ودقيت عليه اعطاني رقم شركة الناهل سيرفر سنتر
وادق عليهم ولا يردوا دقيت على اكثر من خمس ارقام حتى الرقم المجاني بدبي والرياض ولا احد فادني
السلام عليكم
وحمدلله ع السلامه
رجائي اوطلبي ممكن العنوان بالتحديد وين من شارع فلسطين لاني مو من جده وبعدين ممكن الرقم تبع خدمة العملاء
مع جزيل الشكر والامتنان
اسهل طريق تجي من طريق الحرمين ( الخط السريع)
ومن كبري فلسطين تروح للغرب وتمشي راح تحصل على يمينك مدينة الكمبيوتر
الوكيل في نفس المدينة بس من الخلف
ودا المكان في ويكي مابيا
http://wikimapia.org/#lat=21.5383299&lon=39.2203867&z=17&l=0&m=b
مشاء الله ع سرعة الرد
يعطيك الف عافيه 