خلاصة رحلتي للمدينة المنورة

يوم السبت 5 يوليو رحت المدينة المنورة
أبوية ما راح معانا ( كان عندو عمل ) يعني الي يسوق انا واخوية الي اكبر مني
اخوية الله يحفظو قال هو يبغى يسوق كل الخط وانا من باب الإيثار  :ui: سبتو يسوق :)
وصلنا المدينة على الساعة 9 الليل (مشينا من جدة 5 العصر) رحنا لبيت سيدي (الي هو ابو امي :))

تنظيم الوقت كان عندي كالتالي
الصبح نوم  :q: وقت ما اصحى على الكمبيوتر (وقت ما كان شغال )
بين المغرب والعشاء اروح الحرم  وكمان الفجر يعني ثلاثة صلوات في الحرم

خلاصة الرحلة

اول شيء لا تفكر تشتري معالجات سلرون أو ما شبهه حتى لو استخدامكـ قليل وما تشغل برامج انا اقلكم قصة سارتلي في جهاز كان سلرون المهم بدأ يعلق الفاير فوكس كل شوية تخيلو اجي اكتب رد في مدونة اثناء الكتابة يقفل الفاير فوكس واعيد اكتبو من جديد   :8( قلت ممكن المشكلة من الفاير فوكس جرب الإكس بلور برضو ، بعد يوم الجهاز سار ما يدخل الوندوز !! يدخل البوت ويعلق وانا ما معاي سي دي الوندوز ( في جدة :D ) قعدنا 3 ايام بدون نت :8( نحاول في الكمبيوتر مهو راضي  جربت شلت الرام و شلت البطارية برضو ما نفع ما يرضى يتفرمت في النهاية غيرنا الرام وبدلنا مزود الكهربة لـ قارئ السي دي
في النهاية اشتغل المهم طلعت المشكلة اننا خلينا الكمبيوتر شغال وقت كثير !! فعشان كده ضرب :a:

الإفتخار بعاداتكـ وتقاليبدك يجعل الناس تحترمكـ سيدي قلي قصة سارتلو في تركيا ( ترا يروحها من زمان مو عشان التغيرات الحاصلة  ;) ) المهم هو كان في حديقة وكان رئيس الوزراء ( مو اردقان ولا عبدالله قولد واحد قبلهم  مدري اش اسمو ) رايح يفتتح حاجة في الحديقة المهم سيدي كان مع الناس الا شوية يشوف رئيس الوزراء جايلو  :t: هو اتقدم والعساكر بعدو عن المهم الرئيس سلم عليه وبعدين مشي طبعاً تستغربو ( زي ما انا استغربت ) ليش الرئيس سلم علي سيدي مع انو في سعوديين كتير هناكـ  سيدي حتى برة ما يلبس الا الثوب الأبيض  :f:


في المدينة اياكـ ثم اياكـ ان تحاول الخروج من البيت في الظهر لأنكـ ستتحول الى مخلوق مشوي  هناكـ!! مو بس الجو حار حتى الهوا الي يضرب فيكـ تحس بحرارة عالية :(

حدث شيء غريب وانا بسوق السيارة وقفت في تفتيش قلي الرخصة!!  أنا عطيتو الرخصة والإستمارة قلي ما ابغى الإستمارة بس الرخصة  هذا اول مرة يُطلب مني رخصة القيادة في حياتي :D

ايضاً شوارع المدينة للأسف اغلبها مهي مخططة تخيلو شارع كبير 3 مسارات خطوط المسارب انمسحت مع القِدم بس الحق يقال شوارعهم مافيها زحمة ( امس في جدة وانا راجع من طريق الملك الساعة 10 الصبح اشوف الخط التاني موقف لمسافة 2 كيلو أو أكثر طبعاً ما في لاحادث ولا شيء ) وكمان الشوارع مافيها حفر!! بس في عندهم ناس ما تعرف تسوق خاصة اصحاب الونيتات (يجيكـ واحد ياخذ مسارين يحسب الخط حق ابو !! واشياء زي كده )

في الرجعة لجدة أنا كنت اسوق في العصر ( خرجنا حوالي 4 ونص العصر )

الموهم كلهم نامو أول الطريق حتى ابوية ( ابوية بعدين جا المدينة لوحدو )  المشكلة حتى انا شوية نعسان كل شوية اتثاءب مع انو ابوية قلي اذا نعسان انا اسوق بس شايفو نايم المهم قلت خليني اطالع في الطريق واقرأ كم سورة عشان ما انعس المهم لاحظت شيء غريب في الطريق أول شيء في لوحات تقسم فرق صيانة الخط وكمان في مناطق اعادو سفلتتها ( الإسفلت الجديد مرة جنان بس مشكلتو مافي عيون البس )
وفي شيء بصراحة غريب جداً السياج الي بين الخطين في مناطق منو فيها ابواب مفتوحة ( انا قلت ابواب ) وفي مناطق مشيول السياج ( يعني في سيارة صدمت فيه ) بصراحة دا يعتبر جداً خطر وخاصة في ناس تقطع الخط بالعرض عشان يروح قريتو ولا اي شيء زي كده وانا ماشي كم واحد شفتو عبر ( تخيل خط سريع جداً يعبرو بالعرض !! )
في موقف طريف في الليل ( اخوية الي كان يسوق ) اخواتي شافو عيون البس (عيون البس هية دي الأشيء في موجودة في الإسفلت وتنور لمن يجي عليها ضوء السيارة ) قالو الشارع فيه لميع  هههههههه

وتوتة توتة انتهت الحدودة حلوة ولا بنتوتة <<<< كح كح غبآآآآآر

تعليقان (2) على “خلاصة رحلتي للمدينة المنورة”

  1. << ولد المدينة :)

    أهلاً أهلاً بـ عامر ^^

    اقتباس :

    في المدينة اياكـ ثم اياكـ ان تحاول الخروج من البيت في الظهر لأنكـ ستتحول الى مخلوق مشوي هناكـ!! مو بس الجو حار حتى الهوا الي يضرب فيكـ تحس بحرارة عالية

    ــــــــــــــــــــــــــــــــــــــــــــــــــــ
    هههههههههههههههه

    المدينة حرها حر وبردها برد

    يعني في كلتا الحالتين خليك مستعد للهجوم البردي او الحري << حلوة بردي وحري هخخخخ ( معليه مشيها لسه جديدة في السوق ههههههههههههه )

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*