حج 1429 هـ-2

الجزء الأول

يوم العيد

وصلنا المخيم على الساعة 10:30 رمينا جمرة العقبة ، مكان مخيمنا يخلينا نروح لدور الثالث من الجمرات ( الجمرات: دور ارضي واول وثاني وثالث حتى الآن ) كان جداً فاضي كنت ارمي وصدري على الحوض ، وبعدين نزلنا تحت عشان نحلق تفاجأت بوجود اماكن اشبها بالأقفاص ممتلئة بالبشر ! وتشوف كم واحد جالس يحلق بالموس وبدون ما يحط على الشعر موية او شامبو ! يعني على الناشف ! وتشوف مناظر مخيفة !

الحملة ماجابت حلاقين بسبب منع الوزارة لدا الشيء ! بصراحة حالة مأساوية يعني ممكن عدد الحلاقين الرسميين ما يتجاوز 200 بالمقارنة عندك فوق 1.5 مليون حاج يبغى يحلق في منى !

ما ارتحنا للوضع تحت حصلنا واحد يبيع امواس (تستخدم مرة واحدة ) وطلعنا للمخيم كان في واحد جنب المخيم يقول انو حلاق ( بعدين عرفنا انو سواق ! ) المهم جبنا الموية والأدوات من المخيم وقعدت في الطابور لين حلق ليه طبعاً مهي حلاقة كانت جزارة بسـ الحمدلله ما انجرحت وبرضو زي الكل ماحلقلي مزبوط

في ناس في المخيم مع الزحمة حلقو لبعض في ناس غرزت الموس في رؤوس ناس وحالة ما يعلم بيها الا الله :jk: .

ما حسيت بالعيد الا في الليل :D

صورة للمخيم

أيام التشريق

كل يوم كنت اروح ارمي الجمرات في الدور الثالث ( الأخير حتى الآن )

في يوم 11 بعد ما رميت الجمرات طبعاً ماتقدر ترجع من نفس الطريق الي جيت منو (كل الطرق اتجاه واحد ) المهم فقلت خليني اسأل شرطي اش اقصر طريق (مع انو في المخيم قالو لنا على طريق ) بس انا كسلان كنت ابغى اقصر طريق جيت عن واحد من العساكر قلتلو اش اقصر طريق عشان اروح مربع 26ب << مسوي فيها فاهم :pg:

راح طالع فيه قالي انته عربي ! انا وجهي سار زي كده :l: قلتلو لا سعودي :ui: قلي طيب روح انزل من السلالم واسأل تحت الشرطة يقولولك  قلت في نفسي ماجبت شيء جديد انا اعرف اوصل المخيم

في يوم 12 بعد مارمينا الجمرات رحنا نزلنا بالسلالم الكهربائية ونحن عند السلم الكهربائي في وحدة عجوزة من مصر خايفة شكلها اول مرة تركب درج كهربائي ، كانت خايفة وما تبغى تنزل لكن بعد ما شجعها زوجها نزلت :D بصراحة داالموقف من المواقف الي ما تنسى في الحج

القصص الي تقول ناس ترمي الجمرات بالجزم (الله يكرمكم ) ماشفتها ممكن عشاني في الدور الثالث

جسر الجمرات

دا جسر الجمرات

حوض الجمرات

حوض الجمرات في الدور الثالث

حوض الجمرات 1429

جانب من حوض الجمرات في الدور الثالث

صورة لمكيفات الجمرات

دي صورة للمكيفات الصحراوية الي موجودة في جسر الجمرات ( دي مهي شغالة لأنهم لسه ما خلصو البناء )

نحن كنا متأخرين

يوم 13 على الساعة 2:30 رحنا مكة وصلنا على الساعة 5 تقريباً

اول شيء قلنا خلينا نحاول نطوف في الصحن لأنو اسرع وخاصة نحن رجال وشباب

حصلنا الصحن مغلق (شرطة واقفين على درج الصحن ومانعين الناس تدخل )

بصراحة شفت مناظر ما تدل على انو الي سوها حاجيين وخاصة السود الي من افريقيا يدفدفو ويدخلو بعضلاتهم ! واذا مشيو في ممر مايخلو احد يقطع صفهم على طول يدفوه ! ، في واحد شفتو قاعد يدف واحد من الشرطة الي قاعدين على درج الصحن في النهاية الشرطي قلو دي اعمال واحد حاج !  (الله يعيين الشرطة )

بعدين طلنا للدور الثالث وطفنا مشينا نص شوط وبعدين اذن المغرب ( حاجة اول مرة اعرفها في الحرم ايام الحج يأذنو وعلى طول يقيمو الصلاة ) ، بعد المغرب رحنا كملنا الطواف  خلصنا الطواف على الساعة 9 نقريباً ، باصات الحملة كانت في مواقف كدي رحنالها وبعدين لجدة :ui: وصلت البيت تقريباً على الساعة 11 في الليل .

على فكرة المخيم في منى كان في منطقة اسمها مجر الكبش بصراحة الإسم مررة خطير احسو اكشن :wq: (يقولو دا المكان الي نزل فيه كبش اسماعيل (عليه السلام ))

اقتراحات لوزارة الحج

  1. اول شيء الحمامات حمامات الحريم ملصقة بحمامات الرجال (اكرمكم الله ) يعني وانته في الحمام ما يفصل عن حمام الحريم الا جدار واحد والجدار عايدي كالجدار الي يفصل بين حمام وآخر !
    وانا قاعد اتروش يوم 10 شويه اسمع صوت حرمة تقول اخرجي بسرعة انا ما استوعبت اش جاب الصوت بعدين انتبهت انو الحمامات ملصقة !
    هو الغلط من البناء لكن ممكن دحين لو ترفعو الجدار الي بينهم وتحطو عازل للصوت ربما يكون حل
  2. منع الإفتراش هذا ماشفتو الا في التلفزيون ! في كل مكان في منى في افتراش طبعاً ما تقدر تمنع الناس من الإفتراش لكن ليش ما تخلو اماكن محددة للإفتراش بدل من المنع التام

المرور

  1. شاهدت الكثير من السيارات الصغيرة في طريق عرفة وفي داخل عرفة ! مع اني اسمع انو ممنوع فكيف تدخل ؟
  2. شاهدت الكثير من الحافلات المخالفة ومن مخالفتها تعرقل الطريق يعني تحصل سيارة مخالفة يدخل الطريق وبعد ما يوقفها الشرطي تتحرك للإتجاه المفترض تمشي فيه او تجي توقف تتجادل مع الشرطي اتوقع احسن حل اصدار مخالفة لأي سيارة تعمل دا الشيء تحت مسمى عرقلة الطرق

هذي بعض الكلمات كتبتها على عجلة بعد تأخر الموضوع تأخر شديد :bo:

ادعولي بالتوفيق في الإختبارات الجاية اكتر مادتين خايف منها Communication Skills و مادة ELCS :bo:

6 تعليقات على “حج 1429 هـ-2”

  1. قلي طيب روح انزل من السلالم واسأل تحت الشرطة يقولولك قلت في نفسي ماجبت شيء جديد انا اعرف اوصل المخيم

    دي مشكلة العساكر اللي جايين من مختلف انحاء المملكة وحتى خرايط ماعندهم
    المفروض يعني على الاقل يكون عندهم خريطة للمشاعر وللحرم
    يعني مرة كانت وحدة من قرايبي في الحرم وضاعت سألت الشرطي فين باب الملك عبدالعزيز قالها أنا من الرياض وما أعرف
    أسأل الشرطي اللي هناك
    سألته طلع من الباحة وبرضوا ما يعرف
    سألته طيب أنا دحين فين موقعي برضو طلع مايدري
    ياناس والله مايصير كدا

    القصص الي تقول ناس ترمي الجمرات بالجزم (الله يكرمكم ) ماشفتها ممكن عشاني في الدور الثالث

    وممكن عشان الحجاج صار عندهم توعية أحسن يعني أفتكر شفت الحاجات دي كتييير لما حجيت قبل ٩سنين
    وقبل سنتين لما حجيت ما افتكر شفت شي زي كدا
    دي السنة رميت من الدور الأرضي والأول وماشفت شي زي كدا

    منع الإفتراش هذا ماشفتو الا في التلفزيون ! في كل مكان في منى في افتراش طبعاً ما تقدر تمنع الناس من الإفتراش لكن ليش ما تخلو اماكن محددة للإفتراش بدل من المنع التام

    طيب انت تقول انك ماشفت منع الافتراش تعرف ليه
    لأنك ماشفت الافتراش اللي كان قبل كدا :e:
    يعني الساحات اللي حولين الجمرات كانت كللللللها حجاج ودحين فااااااااضية
    ومنى ماكنت تلاقي فيها مكان تمشي ودحين تعتبر فاضية ومريحة<<< ترى دي خبرة سنييييييييييين افتراش :ui:

    شاهدت الكثير من السيارات الصغيرة في طريق عرفة وفي داخل عرفة ! مع اني اسمع انو ممنوع فكيف تدخل ؟

    صح..كيف تدخل؟؟

    ادعولي بالتوفيق في الإختبارات الجاية اكتر مادتين خايف منها Communication Skills و مادة ELCS :bo:

    الله يوفقكم يارب ويسهل لكم أموركم وييسر لكم المذاكرة
    ليه خايف من مهارات الاتصال ترى مايبالها غير قراءة بس بتركيز ووعي حتى حفظ مافيها إلا لو مرة يعني التعاريف مع انك لو ركزت عليها شويتين تنحفظ
    وبعدين أسئلتهم سهلة مافيها شي يعقد
    الحاسب مادرست نفس منهجكم بس عموما أسئلتهم مفهومة ويحبوا الاختصارات مرة << طبعا دا حسب الاستاذة اللي درستني بس انتو دحين عندكم لجنة تحط الأسئلة
    أسئلتكم كلها صح وخطأ واختيار من متعدد، صح؟!

    حاسة انو التعليق أطول من الرد بس مشو حالكم ، عندي اختبار ومافي اذاكر
    دعواتكم..

  2. ما شاء الله حج مبرور وسعي مشكور …
    الله يبارك لك بحجك ..
    والله الكلام حلو جدا .. والاحساس احلى ..
    مكان الجمرات وتصميمه جدا رائع ..
    وقت ما كنا فيه كان فيه شمس تدخل الى ربع الجمرات وكان المنظر جدا جميل ..
    ما كنت ابي اصور صراحة واتفقت مع نفسي اني مااصور شي ..
    لكن هالمكان كان فعلا يستحق التصوير :)

    موفق بالاختبارات يارب

  3. [quote comment=”613″]

    قلي طيب روح انزل من السلالم واسأل تحت الشرطة يقولولك قلت في نفسي ماجبت شيء جديد انا اعرف اوصل المخيم

    دي مشكلة العساكر اللي جايين من مختلف انحاء المملكة وحتى خرايط ماعندهم
    المفروض يعني على الاقل يكون عندهم خريطة للمشاعر وللحرم
    يعني مرة كانت وحدة من قرايبي في الحرم وضاعت سألت الشرطي فين باب الملك عبدالعزيز قالها أنا من الرياض وما أعرف
    أسأل الشرطي اللي هناك
    سألته طلع من الباحة وبرضوا ما يعرف
    سألته طيب أنا دحين فين موقعي برضو طلع مايدري
    ياناس والله مايصير كدا
    [/quote]

    يبال اي واحد بيشتغل في الحج ياخذلو دورة لمدة يوم يعرف مناطق منى + مناطق الحرم + اسماء الفنادق والمعالم +كمان يكون عندو خريطة للمنطقة + يتعلم كلمات انجليزية
    انا اخويه راح لفئة ج وما عرف كيف يرجع ( ما كان معاه الإسورة ) راح سأل شرطي تعرف الطريق الي يودي لمجر الكبش
    الشرطي قلو ما اعرف بعدين اخويه قلو في أ الشرطي قلو روح للجمرات !

    شرطي في منى وما يعرف اهم المعالم والأسماء :df:

    [quote comment=”613″]

    منع الإفتراش هذا ماشفتو الا في التلفزيون ! في كل مكان في منى في افتراش طبعاً ما تقدر تمنع الناس من الإفتراش لكن ليش ما تخلو اماكن محددة للإفتراش بدل من المنع التام

    طيب انت تقول انك ماشفت منع الافتراش تعرف ليه
    لأنك ماشفت الافتراش اللي كان قبل كدا :e:
    يعني الساحات اللي حولين الجمرات كانت كللللللها حجاج ودحين فااااااااضية
    ومنى ماكنت تلاقي فيها مكان تمشي ودحين تعتبر فاضية ومريحة<<< ترى دي خبرة سنييييييييييين افتراش :ui:[/quote]
    ايوه صح الجمرات كلها فاضية وفي عساكر ما يخلوك تعكس ولا توقف لازم تمشي

    [quote comment=”613″]

    شاهدت الكثير من السيارات الصغيرة في طريق عرفة وفي داخل عرفة ! مع اني اسمع انو ممنوع فكيف تدخل ؟

    صح..كيف تدخل؟؟[/quote]
    مدري انا كمان !

    [quote comment=”613″]
    الله يوفقكم يارب ويسهل لكم أموركم وييسر لكم المذاكرة
    ليه خايف من مهارات الاتصال ترى مايبالها غير قراءة بس بتركيز ووعي حتى حفظ مافيها إلا لو مرة يعني التعاريف مع انك لو ركزت عليها شويتين تنحفظ
    وبعدين أسئلتهم سهلة مافيها شي يعقد
    الحاسب مادرست نفس منهجكم بس عموما أسئلتهم مفهومة ويحبوا الاختصارات مرة << طبعا دا حسب الاستاذة اللي درستني بس انتو دحين عندكم لجنة تحط الأسئلة
    أسئلتكم كلها صح وخطأ واختيار من متعدد، صح؟!
    [/quote]
    ELCS مادة الحاسب !
    لأ دي مادة الإنجلش
    الي مخوفني اول شيء انجيزيتي تعبانة وكمان الإختبار على 5 Chapters
    وكمان الدرجة حق الإختبار الي فات مااعطونا هيه

    اما مهارات الإتصال
    فمشكلتها انها اغلبها حفظ وانا في الحفظ تعبان :cry: والإختبار الي فات جبت درجة منخفضة قليلاً

    اسئلتنا كلها اختيار متعدد مافي كتابة
    بس مفهومة بصراحة لأ
    من المنهج لأ مو كلها الحاسب جا سؤال من كتاب تاني !
    ومهارات الإتصال جا سؤال من باب لسه ماوصلنا لو !

    الله يوقفك في الإختبار وتجيبي الفل مارك :)
    الرد طويل بسـ رائع :loj:

    [quote comment=”614″]:dg: :dg:
    ماشاء الله عليك خطير
    وأقتراحات أخطر

    الا اقول :cv: سرايركم دورين ؟[/quote]
    دورين !!!

    لا يكون حسبتي الحدايد الي فوق اسرة !!!
    الحدايد الي فوق عشان نحط العفش فيها اما السرر
    النظام كنبة تفكها تسير سرير

    [quote comment=”615″]ما شاء الله حج مبرور وسعي مشكور …
    الله يبارك لك بحجك ..
    والله الكلام حلو جدا .. والاحساس احلى ..
    مكان الجمرات وتصميمه جدا رائع ..
    وقت ما كنا فيه كان فيه شمس تدخل الى ربع الجمرات وكان المنظر جدا جميل ..
    ما كنت ابي اصور صراحة واتفقت مع نفسي اني مااصور شي ..
    لكن هالمكان كان فعلا يستحق التصوير :)

    موفق بالاختبارات يارب[/quote]

    انا بقول موقف سرلي
    دوبي افتكرتو كنت رايح للجمرات اخذت معاي الشمسية ومشيت ( يقالكم خايف من الشمس )
    عند الجسر الشرطي قلي قفلها عشان لا يتآذا الناس بيها في الزحمة

    بسـ الشمس دي تدخل عشان ما خلصو الجسر السنة الجاية راح يكون مغطى

    انا كنت متردد في التصوير اقول بالذات عشان الحريم يعني لمن تصور لازم تكون في حرمة وانا ما ادري يرضو لا لأ
    بسـ في النهاية قلت مو التلفزيون بيصور وفي كمان كمرات كثيرة في الجمرات من النوع الي تكون الكميرا جوة كورة سودة

    وحج مقبول يارب :p:

  4. الله يكتب لك حجة ثانية يارب :)
    بس اهم شئ انك مشيت بنفس الطريق الطويل :ui: >> ترى الشرطي اللى سئلته يمكن اول مرة يجي هالمكان مو شرط يكون يعرف ” يمكن الطريق اللى انت تعرفة اهو مايعرفة لووووول ” ..

    الله يكتب لك الاجر في كل خطوة خطيتها في الحج ..

  5. صدق او لا تصدق ,,

    شفت الناس هذه السنة ( وخاصة الحريم ) يرمون الجزم في الجمرات ,,

    طبعا هذا الكلام كان في الدور الاول ,,

    وما ادراك ما الزحام ,,

    الواحد نجا باعجوبة يوم 12 من الزحمة ,,,

    كانت حرب ,,!!

    الله المستعان بس ,,

    اهم شئ اننا رجعنا بيتنا ,,

    ولله الحمد ,,

    يعطيك العافية ,,

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*