رحلتي لجامعة الملك عبدالله (كاوست)

يوم الاثنين الماضي كانت هناك رحلة من جامعتنا الى جامعة الملك عبدالله للعلوم والتقنية ( كاوست KAUST ) هم اختارو الطلاب الممتازين وانا كنت منهم:)

هم قالولنا تعالو الساعة 8 الصبح عند مركز الملك فهد للأبحاث الطبية

على الساعة 8:20 تقريباً جات حافلة من كاوست

تقريباً تسعة الا ربع مشي الباص للجامعة

على الساعة 10:25 كنا وصلنا البوابة الاولى للجامعة ( في تلاتة بوابات تعديها عشان تدخل المباني الأكاديمية !)

بعد البوابة الأولى رحنا عند الامن عشان يعطونا بطاقات الدخول قعدنا حوالي نص ساعة في المبنى وبصراحة بدون اي سبب يدعو للتأخير بطاقات الأحوال اخدوها من اول وبطاقات الدخول وزعت بعدين عشوائياً ( بعدين هم اعتذرو على التأخير اللي سار)

المهم عدينا البوابة التانية والتالتة بسرعة ودخلونا المبنى الرئيسي

أول شيء كان في برزنتيشن عن الجامعة ومميزاتها ومتطلبات التسجيل

وبعدين جا دكتور تخصصو تقريباً في Fluid Mechanic ، اتكلم عن تجربتو في الجامعة وكيف الجامعة توفر جميع التجهيزات للبحث العلمي يعني مثلاً هو طلب كمرات تصور 1000 صورة في الثانية، طلب 2 وجاتو 7 وزي كده وكمان التكلم عن بحثو اللي هو كيفية زيادة دقة الطابعات العايدية

وبعدو رحنا للـ Diner Hall  اللي نقدر نقول عليه المطعم المركزي ، بصراحة المطعم جداً رائع مقسم الى كم قسم مأكولات شرق أوسطية ، ابطالية ، مشويات …

وبعدها صلينا الظهر في مسجد الحرم الجامعي

في شيء جميل في الساحة الكبيرة مقولة للملك عبدالله عن سبب انشاء الجامعة

المقولة “رغبة مني في إحياء ونشر فضيلة العلم العظيمة التي ميزت العالمين العربي والإسلامي في العصور الأولى، فقد رأيت أن أؤسس جامعة الملك عبدالله للعلوم والتقنية على ساحل البحر الأحمر

وبعدها رحنا المكتبة واخدونا في جولة

وبعدها رحنا core labs  أو المختبرات المركزية

منها مكان فيه شاشات كبيرة لعرض الصور

حسب ماقالولنا الهدف منها انها تعطي الباحثين القدرة على عرض الصور ذات الحجم الكبير جداً وتساعدهم في التحليل واشياء اخرى

بعدها كان عندنا وقت فاضي فودونا متحف العلوم والتقنية في الاسلام

صور المتحف موجودة في المعرض اللي اسفل التدوينة لكن احب اتكلم عن ما اسميه لوحة التاريخ

دي اللوحة باللمس فيها أبرز الاحداث اللي سارت تحت كل فترة زمنية في الاسلام ( اتوقع انو الشاشة هيه من تقنية windows surface )

وبعدها اخدونا في رحلة داخل الحرم الجامعي

بس المدينة الجامعية تقريباً فيها كل شيء يحتاجو الواحد والحدائق متنوعة وكمان في فعاليات عشان الناس ماتشعر بالملل

وبعدها ودونا وحدة من الشقق

من الأشياء الجميلة في كاوست

  • نظام النفايات مقسمة حسب النوع

اتمنى منجد انو النظام يبدا يطبق في الأماكن المغلقة زي الشركات والمجمعات السكنية والجامعات وحبة حبة الين ما تنتشر الثقافة في المجتمع

  • ايضاً الجو مرررة لطيف هدا ونحن كنا برة الساعة 11 و 12 وماحسينا بالحر ، السبب برأيي كترة النوافير والأشجار لدرجة انك تحصلها في كل مكان
  • وهناك ايضاً شيء لفت نظري وهو كترة الدراجات ووجود مواقف لها في الجامعة ، طبعاً اتوقع النقطة اللي فوق ساهمت ايضاً انتشار الدراجات بالإضافة لتشجيع الجامعة ( الدراجات صديقة للبيئة)
  • وأيضاً أسماء المباني على أسماء كبار علماء المسلمين في العصر الذهبي زي الرازي و ابن سينا

وهناك مجموعة من الأشياء الى اتمنى انهم يطوروها في الجامعة او يسووها

  • اول شيء البوابات دي اللي تحسسك انك داخل على سجن ولا منشاة عسكرية شديدة السرية !  انا اتفهم اجراءات الأامن بس يعني لو يحطوها بشكل يخليك ماتحس بدا اشيء ، بس برضو لا يتهاونو في موضوع الأمن لأنو لو اي شيء صغير سار ممكن يخرب اللي اتبنى كلوا !! ومعرض الكتاب اللي في الرياض مو بعيد عننا.

انا عن نفسي حطيت كاوست ضمن احد الأماكن اللي ممكن أروحها بعد ما اخلص البكلوريوس

ايش رايكم في كاوست ؟

اللي يجي يقلي على الاختلاط ومدري ايش بصراحة انا شفت الناس اللي هناك محترمين مرررة ولا المسخرة اللي عندنا مرات تسير في الأسواق.

معرض الصور

اضغط على الصورة للتكبير

(في صور لسه ماجاتني يعني لاتنسى تشيك على الموضوع بعد اسبوع تحصل الصور كاملة :) )

* ملاحظة الصور معظمها من كمرتي وهناك صور من الفيس بوك

في صور في ألبوم في الفيسبوك لاحد الطلبة اللي كانو معانا

لتحميل الصور بدقة عالية ( صور كمرتي )  – الرجاء عند استخدام الصور ذكر المصدر

13 تعليقا على “رحلتي لجامعة الملك عبدالله (كاوست)”

  1. وااااااااااو ما شاء الله حماااااسينج :uo: <<<قصدها عالمطعم خخخخ
    لا بجد مررره المكان يحمس الواحد يقدم شي مفيد :po:
    تقرير جميل شكراً لك أخوي الممتاز اللي أخدوه للرحلة القميلة دي :ui:

    حبيت استخدامهم الدراجات ونظام النفايات وأسماء المباني جداً حركة كويسة :dg:
    يلا إن شاء الله نشوفك فيها بعد البكالريوس ;)

  2. :)
    بجد شيء نفتخر فيه مرررره
    تطور والمعدات والاجهزة باين عليها الاهتمام
    واتمنى يبتدي تطبيق الكثير من الأنظمة فيها في باقي الجامعات

  3. تقرير جميل جدا،، اول مره اشوف كاوست من داخل مره تحمس :D

    واهم واحلى حاجه حبيتها الدراجاات 3>

    شكرا اخي على اخذنا لهذي الجوله الرائعه :dg:

  4. سلام
    الله يبارك الملك ما يدخر جهد لتعليم ابناء بلده
    ليس مثل الجزائر فالحكام لا يدخرون جهد لكسر التعليم
    و جعل الشعب في دوامة جهل بالقرارات التعسفية
    اتمنى لو اكون طالب هناك ، على فكرة الدراسة مجانية او مدفوعة ؟

    1. جميع الطلاب في كاوست بمنح دراسية

      كل طالب لو سكن وكل شيء
      بالنسبة للراتب للماجستير 2000 دولار
      اما الدكتوراه شويه اعلى اتوقع 2300 دولار

      طبعاً الشيء اللي تحتاج فيه الفلوس الاكل والملابس

  5. يعطيكي العافية
    بصراحة اشي فاخر ع الآخر
    بس عندي شوية أسئلة بخصوص الجامعة
    هل الشهادة من هذه الجامعة معترف بها في الدول الصناعية
    كام نسبة طلاب الجامعة من أبناء البلد(يعني سمعت قبل هيك انو غالبية طلابها من الأجانب)
    كم تخصص الجامعة من ميزانيتها في مجال البحث العلمي؟؟؟!

    1. بالنسبة للشهادة هل معترف بيها ولا لأ اكيد معترف بيها
      اذا الجامعات اللي اقل منها من ناحية التجهيز مثل جامعة الملك عبدالعزيز معترف بيها

      بالنسبة لنسبة السعوديين اتوقع قالو 11%

      بالنسبة للسؤال الاخير ما ادري بس الجامعة بتدفع كتير للبحث العلمي وزي ماحكيت في التدوينة في دكتور طلب 3 كميرات تصوير سريع جابولو اكتر من اللي طلبو

  6. وااااااااااااااااا….والله مره حماس

    عندنا يوم الخميس القادم رحلة لنفس الجامعة

    وماكنت مقتنعه اني اروح
    بعد تقريرك المبدع بدأت اغير رأيي نسبيا

  7. بعد البوابة الأولى رحنا عند الامن عشان يعطونا بطاقات الدخول قعدنا حوالي نص ساعة في المبنى وبصراحة بدون اي سبب يدعو للتأخير بطاقات الأحوال اخدوها من اول وبطاقات الدخول وزعت بعدين عشوائياً ( بعدين هم اعتذرو على التأخير اللي سار)

    —–

    اخي الكريم / انت داخل الى جامعة الملك عبدالله للعلوم والتقنية ][ KAUST ][ مو داخل لباب الحاره ;)
    هذ1 اولا

    وثانيا اخي الكريم / التأخير اللي واجهتوه قد يكون من اللي نسق معكم مو من مكتب الزوار .. لان مكتب الزوار ماشي على بروسيجر معروف للجميع ، واكيد كان فيه غلط فالتنسيق ، وانتم ماشاء الله قروب مو واحد او اثنين حتى تخلص اموركم في دقيقتين او ثلاث ..

    وذكرت اخي الكريم انه لايوجد اي سبب يدعو للتأخير .. انت تقول هالكلام وانت ماتعرف النظام والاجراءات المتبعه ، وبالنسبه لقروب زي كذ1 نص ساعه حلوه .. انت عارف انه المفروض واحد واحد تنزلون تطابق بطاقة الاحوال على نفس الشخص وتصرف له بطاقة زائر !!

    هذ1 كله اخي العزيز اجراءات امنيه الهدف منها اولا واخيرا امنكم وامن من بداخل الجامعه ..

    واخيرا .. حياكم الله واهلن وسهلا بكم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*